Saturday, June 19, 2021

रेशनचा काळा बाजार झाला उघड, धान्य व वाहने मिळून 42 लाखाचा मुद्देमाल कोतवाली पोलीसानी केला जप्त,



 रेशनचा काळा बाजार झाला उघड, धान्य व वाहने मिळून 42 लाखाचा मुद्देमाल कोतवाली पोलीसानी केला जप्त,



नगर दि 18 प्रतिनिधी- रेशनिंगचा तांदूळ व गहू काळ्या बाजारामध्ये विक्री करण्याच्या उद्देशाने केलेला सुमारे पावणे आठ लाखाचा अवैध धान्य साठा कोतवाली पोलिस तसेच जिल्हा पुरवठा विभागाच्या पथकाने शनिवारी जप्त केला. शहरातील मार्केट यार्ड तसेच केंडगाव इंडस्ट्रीज इस्टेट अशा दोन ठिकाणी संबंधित व्यापाऱ्याच्या दुकान व गोदामवर शनिवारी दुपारी छापा टाकून धान्य व सहा वाहने मिळून सुमारे 42 लाखाचा मुद्देमाल हस्तगत केला आहे. पोलिसांनी मार्केट यार्डमधील 2 दुकाने व केडगाव येथील संबंधित गोडाऊन सील केले आहे. 



या दोन्ही प्रकरणी कोतवाली पोलीस ठाण्यामध्ये सुरेश रासकर, संग्राम रासकर, आसाराम रासकर, व्यवस्थापक जालिंदर चितळे यांच्यासह दोन वाहन चालक आशा सहा जणांविरुद्ध  गुन्हा दाखल करण्यात आलेला आहे. या कारवाईमध्ये पोलिसांनी 419 गोण्या तांदूळ व 125 गोण्या गहू असा माल मार्केट यार्ड येथील दुकानातून जप्त केला. तर केडगाव येथील गोदामात 132 गोण्या तांदूळ, 247 गोण्या गहू व बारदाण्यात गहू भरलेल्या 47 गोण्या जप्त करण्यात आल्या आहेत. हा सगळा धान्यसाठा हरियाणा व मध्यप्रदेश राज्यातील रेशनिंगचा आहे, पोलिसांनी या धान्यासह रेशनिंग धान्याच्या रिकाम्या गोण्या, 4 ट्रक व एक छोटा हत्ती, एक पिकअप वाहन असा सर्व मिळून 42 लाखाचा मुद्देमाल जप्त केला आहे.


माहिती मिळाली व पथके निघाली


नगर शहरामध्ये रेशनचा गहू व तांदूळ सर्रासपणे काळ्या बाजारामध्ये विक्रीसाठी उपलब्ध करण्यासाठी अवैधरित्या साठा करून ठेवल्याची माहिती पोलिसांना मिळाली होती. ही माहिती पोलीस व महसूल प्रशासनाला मिळाल्यानंतर मार्केट यार्ड येथील सुरेश ट्रेडिंग कंपनी व सोहम ट्रेडीग कंपनी या दोन्ही दुकानावर आधी छापा टाकण्यात आला.हे दोन्ही दुकाने सुरेश रासकर यांच्या नावावर आहेत. पोलिसांनी या ठिकाणी मुद्देमाल हस्तगत करून त्या ठिकाणी असलेली बिलांची तपासणी सुद्धा सुरू केली आहे.ही दोन्ही दुकाने सील करण्यात आली आहेत.



मार्केट यार्ड येथील या दुकानांमध्ये कोतवाली पोलिसांनी काळ्या बाजारात नेण्यात येणार्‍या 253 गोण्या तांदुळाच्या व 125 गोण्या गव्हाच्या सुमारे साडेचार लाख रुपयांचा मुद्देमाल तसेच याठिकाणी दोन ट्रक यांची सुमारे किंमत प्रत्येकी पाच लाख अशा एकूण 14 लाख रुपयांचा ऐवज मार्केट यार्ड परिसरातून हस्तगत केलेला आहे याच वेळी पोलिसांनी व प्रशासनाच्या पथकाने रासकर यांच्या केडगाव इंडस्ट्रीजमध्ये असलेल्या गोदामावर छापा टाकून त्या ठिकाणी तांदळाच्या 132 गोण्या,247 गव्हाच्या गोण्या व 47 आणखी गव्हाच्या गोण्या आशा सर्व मिळून 419 गोण्या जप्त केल्या. मार्केट यार्डमधील धान्य सुमारे पावणे चार लाखाचे तर केडगाव येथील धान्य सुमारे 4 लाखाचे असून दोन्ही मिळून सुमारे 8 लाखाचे धान्य तसेच सुमारे 33 लाख रुपये किमतीची 6 वाहने जप्त करण्यात आली आहेत.


नगर शहराचे पोलीस उपअधीक्षक विशाल ढुमे, कोतवाली पोलीस ठाण्याचे पोलीस निरीक्षक राकेश माणगावकर, सहाय्यक पोलीस निरीक्षक विवेक पवार, सहाय्यक पोलीस निरीक्षक मनोज कचरे यांच्यासह पोलीस कर्मचारी गणेश धोत्रे, सुमित गवळी, शाहिद शेख , नितीन शिंदे, प्रमोद लहारे, बंडू भागवत तसेच पुरवठा निरीक्षक निशा पाईकराव, अन्नधान्य निरीक्षक व कार्यालयीन अधीक्षक संतोष लोटके यांनी ही कारवाई केली आहे. या प्रकरणी दोन गुन्हे दाखल होणार असून पोलिसांनी त्याची प्रक्रिया सुरू केली आहे.


चौकट


या संदर्भामध्ये कोतवाली  ठाण्याचे पोलीस निरीक्षक राकेश माणगावकर यांनी सांगितले की, आम्हाला अवैध धान्य साठ्याची गुप्त माहिती मिळाल्यानंतर पोलिसांनी छापे टाकून 42 लाख रुपयांचा मुद्देमाल हस्तगत केलेला आहे. वेगवेगळ्या प्रकारचे दोन गुन्हे कोतवाली पोलिस ठाण्यांमध्ये दाखल करण्यात आले असल्याचेही त्यांनी सांगून, या गुन्ह्याचा पुढील तपास कोतवाली पोलीस करत असल्याचे ते म्हणाले.

Post a Comment

Whatsapp Button works on Mobile Device only